اسلام آباد۔ 8 جون (اے پی پی): حکومت مالی سال 26-2025 دا بجٹ 10 جون منگل کوں پارلیمنٹ اچ پیش کریسی، جیںدے اچ میکرو اکنامک استحکام، ترقی تے مبنی اصلاحات دے فروغ اتے عوام دی سماجی و اقتصادی توقعات تے پورا اترݨ کیتے ہک جامع روڈ میپ تے توجہ مرکوز کیتی ویسی۔ وفاقی وزیرِ خزانہ و ریونیو سینیٹر محمد اورنگزیب بجٹ پیش کریسن۔ واضح رہوے جو آوݨ آلے مالی سال دا بجٹ ملکی اتے بین الاقوامی محاذاں تے معیشت کوں درپیش موجودہ چیلنجاں کوں ݙیہدے ہوئیں ٻݨایا ڳئے۔ عوام دے مسئلیاں اچ کمی، زرعی شعبے دی جدید خطوط تے تبدیلی، انفارمیشن ٹیکنالوجی (آئی ٹی) دا فروغ اتے برآمدات اچ ودھارا بجٹ دستاویز دا بنیادی اتے مرکزی نقطہ ہوسی۔ بجٹ اچ مالیاتی انتظام دے علاوہ ریونیو موبلائزیشن، معاشی استحکام اتے نمو دے اقدامات، غیر ترقیاتی اخراجات اچ کمی، روزگار دے موقع پیدا کرݨ اتے ملک دی سماجی و اقتصادی خوشحالی کیتے عوام دوست پالیسیاں وی شامل ہوسن۔ ذرائع آکھیے جو مالی سال 26-2025 دے وفاقی بجٹ دے اعلان دیاں تیاریاں مقررہ ٹائم لائنز دے مطابق زور و شور نال جاری ہن۔ بجٹ سارے شراکت داراں، محکمیاں اتے وزارتاں وچال قریبی تال میل نال تیار کیتا ویندا پئے۔ ایں دوران ملکی معیشت دی صورتحال پیش کرݨ والی ہک اہم پری بجٹ دستاویز “اکنامک سروے آف پاکستان” 9 جون (سوموار) کوں جاری کیتا ویسی۔ اے سروے اختتام پذیر مالی سال دے دوران معیشت دی مجموعی کارکردگی کوں اجاگر کریسی جو ہک حقیقت پسندانہ رائے اتے مستقبل دی منصوبہ بندی دی بنیاد وی فراہم کریسی۔
.jpg)
.jpg)
